Vedtekter for Saftkokaradn
Saftkokaradn
Namnet er henta frå Sogndal si over hundre år gamle hjørnesteinsbedrift, saft- og syltetøyprodusenten Lerum.
Stiftingsdato
2001
Avgjerdstakande organ
I god demokratisk ånd er supporterklubbens høgaste organ årsmøtet, og det ekstraordinære årsmøtet. Mellom årsmøta er styret det øvste avgjerdstakande organet.
Organisatorisk tilknyting
Saftkokaradn er den offisielle supportargruppa til Sogndal Fotball og Sogndal Fotballklubb Damer.
Saftkokaradn er som oftast representert på alle Tryggleiksmøta i høve heimekampane på Fosshaugane. Saftkokaradn er og har vore aktiv medlem av Norsk Supporterallianse sidan etableringa i 2001.
Formål og målgruppe
Saftkokaradn bidreg som best me kan til å støtte LAGET både på heime og bortebane: Sogndal Fotball og Sogndal Fotballklubb Damer. Supporterklubben er ein uavhengig, frivillig og allmennyttig organisasjon.
Utanomsportslege føremål
Saftkokaradn støttar MOT og tek avstand frå rasisme, religiøs, politisk eller seksuell diskriminering og mobbing. Saftkokaradn legg til grunn Norsk Supporterallianse sine prinsipp for god supporterskikk. Grove brot mot disse prinsippa kan medføre bortvisning frå feltet og eksklusjon frå medlemsskap.
Medlemmer
Supporterklubben har ulike medlemskapsformer (barn/honnør/støttemedlem/studentmedlem/ enkeltmedlem (vaksen frå 16 år)/ familiemedlemsskap (same husstand)/ bedriftsmedlemsskap).
Alle medlem, med unntak av støttemedlem og bedriftsmedlem, har lik rett på medlemsfordelar.
Alle pliktar å forstå og følgje god supporterskikk. Medlemmer må vise medlemsskapsbevis for å få tilgang til mange av medlemsgodane (rimelegare billettar på heimekampar, tilgang til bortebillettar supporterklubben måtte disponere, og ev. rabattar supporterklubben har framforhandla).
Medlemsstatus
Status som medlem får ein normalt når kontingenten er betalt. Kontingentperioden følgjer kalenderåret. Utmelding må skje skriftleg til styret i supporterklubben, og betalt kontingent vert ikkje refundert.
Ei innmelding kan ved særskilte høve avslåast av styret, om den som søkjer medlemsskap ikkje ønskjer å identifisere seg med grunnhaldningane i Saftkokaradn.
Kontingenten vert vedteken av årsmøtet, og kontingentperioden er mellom årsmøta. Endring av kontingent er for neste sesong.
Medlemmers plikter og rettigheiter
Medlemmane har møte- og stemmerett på årsmøtet og er valbare til verv i supportarklubben.
Medlemmar har rett til informasjon og innsyn i drifta av supporterklubben og skal gå føre ikkje-medlemmar i alle forhold i regi av supporterklubben, for eksempel tildeling av billettar til arrangement som cupfinale eller bortebillettar klubben tildeler oss.
Medlemmar pliktar å rette seg til gjeldande retningslinjer ved kamparrangement og andre samanhengar som regulerast av norsk lov eller supporterklubben sine retningslinjer. Om klubb eller supportarklubb vert straffa pga. handlingar utført av eit medlem kan vedkommande sanksjonerast med bortvising, eksklusjon etc. avhengig av situasjon.
Utestenging
Styret kan utestenge (suspendere/ekskludere) medlemmar etter vedtak med 2/3 fleirtal i styret. Det skal vere mogeleg for den det gjeld å uttale seg før styret fattar vedtak. Årsmøtet er ankeinstans.
Styret
Leiar, eller den leiar har gjeve munnleg fullmakt til dette, kallar inn til styremøter. Styremøter er vedtaksdyktige når halvparten av medlemmene er til stades eller har gjeve fullmakt utanom i saker som krev 2/3 fleirtal. Ved likt tal stemmer tel leiars stemme dobbelt i saker som ikkje krev 2/3 fleirtal. Det skal som hovudregel gjennomførast minst fire styremøter i året. Leiar har ansvar for at protokoll vert ført.
Leiar vert vald på årsmøtet. Styret konstituerer seg sjølv i første møte etter årsmøtet, men årsmøtet har høve til å velje personar til definerte oppgåver.
Styret har høve til å opprette undergrupper ved behov, og underavdelingar, ev. med eige styre og budsjett. Drift av desse må skje under same rammer som styret si drift forøvrig (handlingsplan og budsjett). Styret delegerer sluttansvar. Undergruppene kan ha møte- og talerett på styremøta.
Styret har høve til å stengje ute styremedlemmer. Ei slik avgjerd kan kun takast med kvalifisert fleirtal (2/3) i styret.
Det skal innkallast til ekstraordinært årsmøte når en meir enn halvparten av dei valte styremedlemmene er utstengt eller har trekt seg.
Årsmøtet
Årsmøte vert arrangert før seriestart kvart år. Rekneskapsperioden følgjer kalenderåret.
Innkalling til årsmøtet skjer digitalt via nettside og sosiale medier. Fristen for innkalling er to veker før møtet. Innkallinga til årsmøtet skal innehalde tid , stad og agenda.
Fristen for innsending av forslag og vedtektsendringar er to dagar før (e-post er tilstrekkeleg). Årsmøtepapir vert i hovudsak lagt fram på årsmøtet.
Saftkokaradn er tilhengar av opne møter. Observatørar frå Sogndal Fotball, media og andre interesserte vert ikkje avvist, men observatørar har ikkje talerett.
Årsmøtets gang
Godkjenning av frammøtte medlemmar
Godkjenning av innkalling
Godkjenning av sakliste
Val av ordstyrer, referent og underskrivar av referat
Handsaming av styrets årsmelding
Handsaming av rekneskap
Handsaming av neste års kontingentar
Handsaming av innkomne forslag
Vedtektsendringar
Val
5-7 styremedlemmar og eventuelle varamedlem
Valkomité
Stemmedyktigheit
I hovudsak skal stemmegjeving vera basert på personleg oppmøte. Årsmøtet må i kvar sak først godkjenne om medlemmer vil avgje stemme pr. fullmakt. Saftkokaradn har medlemmar over heile Noreg, så det er opning for dette. Medlemmet må ha betalt årskontigent for årets sesong for å kunne stemme.
Avstemming
Avgjerast av vanleg fleirtal. Skjer ved handsopprekning eller via digitale løysingar. Avgjersle om skriftlege avstemmingar kan vedtas av dei frammøtte.
Val
Avgjerast av vanleg fleirtal. Berre betalande medlem som ikkje er utestengt er valbare til verv. Val av personar bør føregå skriftleg om det er fleire kandidatar, eller dersom dette blir forlangt av dei frammøtte. Alt anna avgjerast ved handsopprekning.
Valperioden er alternerande toårige periodar for styremedlem, og eittårige periodar for øvrige verv, som leiar og valnemnd. Halve styret står kvart år på val.
Vedtektsendringar
Vedtektsendringar kan kun vedtakast av årsmøtet med kvalifisert fleirtal (2/3 fleirtal). Styret har mandat til å gjere mindre (ikkje meiningsberande) endringar i struktur og/eller form på vedtektene utan at dette må handsamast av årsmøtet.
Ekstraordinært årsmøte
Styret kan innkalle til ekstraordinært årsmøte. Ekstraordinært årsmøte innkallast gjerne med same fristar som ordinært årsmøte, og handsamar berre saka/sakene det er innkalla for.
Styret bør kalle inn til ekstraordinært årsmøte dersom en viss andel, minimum ¼ , av medlemmene krever det. Kravet bør framsettes skriftlig med reelle underskrifter.
Oppløysing av supportarklubben
Ved ev. oppløysing havnar resterande ressursar i ny, uavhengig supportarklubb for Sogndal Fotball.
Oppløysing kan berre skje ved kvalifisert fleirtall på to årsmøte – 2/3 av dei avgjevne stemmene. Dei to årsmøta – ordinært og ekstraordinært- må ha minst eit halvt års mellomrom.
Æresmedlemskap
Det er ikkje tradisjon for å utnemne æresmedlemskap i Saftkokaradn, og utnemning av same verdi (livsvarig medlem osv), kan berre gjevast av årsmøtet. Framlegg til æresmedlemskap o.l. må i tilfelle fremjast med same frist som øvrige forslag til årsmøtet. Styret har høve til å omgjere æresmedlemsskap om særskilte tilhøve inntreff, som td. at medlemmet set Saftkokaradn i vanry.
Heidersteikn
Styret i Saftkokaradn har mynde til å gje heidersteikn til medlemmar eller andre som har gjort ein ekstraordinær innsats i løpet av fleire år eller i ein sesong. Styret kan sjølv fastsetje kriteriane, men må ha kvalifisert fleirtal (2/3).
Vedtektene blei oppretta i 2001 og sist endra på årsmøtet 26.mars 2022.